الانشحناط

هى حاله مرضيه موجوده فقط عند المصريين واعراض لمرض اصبح متوطن فى مصرنا. لا يمكن ان يكون عارض ولا هو فيروسى قد يختفى بعد مقاومه بسيطه من جهاز مناعاتنا- اللى مش موجود اصلا !!! بل قد يكون الانشحناط مثل الاورام العاديه التى توجد فى اجسامنا - مش عايز اقول زى الحسنات لان الحسنات كلمه جميله ولا عايز اقول زى الورم بسبب الخبطه لان هذا النوع ينتهى بعد مده ولاننا لم نخبط ولم نصدم حديثا . لذلك هو مرض قائم بحد ذاته , مرض جامع مانع شامل واسمه الانشحناط !!!

الاعراض :
تضارب فى الرؤيه

ما بين ( لأ عيب يا ولد وعيب يا بنت وعيب يا مدام)

وما بين شفت المزه اللى فى قناه ميلودى يا حاج!! والله الواحد نفسه ....فى الحلال طبعا يعيد مجده مع واحده كده!!
تضارب فى الافكار

ما بين احط فلوسى فى البنك مع ان البنك حرام

ولا اسيبها تحت البلاطه واخصر الجلد والسقط والتضخم والـــ......الخ
تضارب فى القرارت
البنت لازم تبقى مؤدبه متحبش ولا تتحبش

– ينهار اسود – بنتى بتحب ؟؟؟ يبقى لازم اخليها فى البيت .

ولا لا اخرجها بس تتحجب .

ولا لا احجبها بس خليها تلبس شويه هدوم حلوة مهو لازم تتجوز برضه !!!!
تضارب فى ردود الافعال
ما بين الايثار وعون المنكوب

الى ( اكسر عليه بالرفف اللى ورا عشان يتربى ابن ....).
ما بين انا صايم من اول الصيام ( 55 يوم ) انقطاعى

وما بين - امبارح عملت سندوتش همبورجر صيامى بالجبنه الصيامى واكلته فى حته صيامى مع اصحابى الصيامى فى يوم صيامى ..

ما بين مكتوب من اخذ السيف بالسيف يؤخذ -

وما بين - بالروح بالدم نفديك يا صليب ( والله يرحمك يا جمال يا عبد الناصرعلمتنا حكايه بالروح والدم والشوربه وسبتنا )

وما بين ادخل الحمام برجلك اليمين

وادخل الشارع مخالف( بس خدها خطف كده) وبالجزمه .... لو حد قالك كده غلط بس خليها بالجزمه اليمين.

ما بين ملكوت الله واسع

وما بين البروستانت كفره- ك ف ر ه- لا يمكن هيوردو على جنه-- ا ب د ا ابدا

ما بين شفت الشيخ .... امبارح لما اتكلم وقال ان السلام على الكفار حرام

وما بين علقت النهارده مزه يهوديه من عن النت بس ايه حكايه !!!!

ما بين انى اسمى المحل بتاعى – سان جوفانى وان اكتب عليه ادخلوها بسلام امنيين !!!!

كم غريب من التناقضات على كل المسويات من غنى الى فقير من جاهل الى امير من طنطا الى القصير ؟؟
مازال العلم يحاول مازال الطب يدرس الاعراض مازالت الاسباب مجهوله

هل هى اعراض انسحابيه ام اعراض انهزاميه ؟ اهى بسبب الاصوليه ام بسبب اللبراليه ؟؟

اهى نتاج مزيج حضارات ام صدام حضارات؟

العلاج
وبالتالى لا يوجد علاج فعال حتى الان . لكن بعض القراءه للجاهل او بعض الصراحه للمنافق قد تفيد

هل تعرف الانشحناط ؟ هل انت مصاب به ؟ هل تعرف احدا مصاب ؟

هل يعرف انه مصاب ؟ هل تتحسن حالته ام تسوء ؟

ما اسباب التحسن وما اسباب التدهور ؟؟

فقد تساعد فى الشفاء او الانشحناط